Եթե դուք սխա՞լ եք նկատել տեքստում, նշեք այն և սեղմեք Ctrl+Enter՝ տեղեկատվությունը խմբագրին ուղարկելու համար:

Երևանի ավագանու  4 մշտական հանձնաժողովներից երկուսը կանայք են ղեկավարելու  

Երևանի քաղաքապետարանում այսօր կայացավ նորընտիր ավագանու  անդրանիկ նիստը:

 

 «Իմ քայլը» դաշինքից ընտրված քաղաքապետ Հայկ Մարությանը շնորհակալություն հայտնեց երևանցիներին՝ իր թիմին վստահելու համար ու խոստացավ․  «Մենք կանենք այնպես, որպեսզի մեր երևանցիները ամեն օր, ամեն ժամ ու ամեն վայրկյան ժպտան: Խոսքս ուղղում եմ մեր ավագանիներին՝ միշտ ուշադիր լինել մեր Երևանի բնակիչների բոլոր խնդիրներին,բոլոր ահազանգերին անհապաղ արձագանքել և բոլոր հարցերը բերել, հասցնել այստեղ, մեր ավագանու նիստին, հանել քննարկման և անհապաղ լուծումներ տալ դրանց»:

 

Նիստի ընթացքում  ավագանու նորընտիր կազմն ընտրեց չորս հանձնաժողովների նախագահների՝ որոնցից երեքն անկուսակցական են: Նշենք,  որ բոլոր հանձնաժողովների  նախագահների պաշտոնների թեկնածուներ առաջադրելու իրավունքը պատկանում է «Իմ քայլը» դաշինքին։ Արդյունքում,    Ֆինանսավարկային և տնտեսական հարցերի հանձնաժողովի նախագահ ընտրվեց Աշոտ Մնացականյանը, Մշակույթի, կրթության և սոցիալական հարցերի հանձնաժողովի նախագահ Սաթենիկ Մկրտչյանը, Քաղաքաշինության և հողօգտագործման հարցերի հանձնաժողովի նախագահը ՝ Արսեն Կարապետյանը։ Իսկ Իրավական հարցերի հանձնաժողովի նախագահ ընտրվեց Արուսյակ Ջուլհակյանը: Բոլորը «Իմ քայլը» խմբակցության անդամ են հանդիսանում: 

 Նախագահի տեղակալի պաշտոններում համապատասխանաբար ընտրվեցին ՝ Լևոն Հովհաննիսյանը, Հակոբ Մելիքյանը,  Մարկոս Հարությունյանը, Գայանե Մելքումյանը: Տեղակալներից մեկն է  ԲՀԿ-ի ներկայացուցիչ, իսկ «Լույս» դաշինքը հրաժարվեց այդ առաջարկից:

 

Դեռևս հայտնի չէ, թե ովքեր են լինելու փոխքաղաքապետերը: Երևանի քաղաքապետարանի հաջորդ նիստը կկայանա նոյեմբերի 13-ին։ Այդ օրը տեղի կունենա նորընտիր քաղաքապետի երդմնակալության արարողությունը:

 

Հիշեցնենք, որ Երևանի ավագնու կազմում ընդգրկված են  «Իմ քայլը» դաշինքի 57, «Լույս» դաշինքի 3 ու «Բարգավաճ Հայաստանի» 5 անդամներ: Կանանց ի մասնակցությամբ այսօր տեղի ունեցավ Երևանի նորընտիր ավագանու առաջին նիստը: Երևանի նորընտիր ավագանու 65 անդամից  18-ն են  կին, ինչը  27.6%  է կազմում: 

Դիտումների քանակը` 699

Վերադառնալ վերև