Եթե դուք սխա՞լ եք նկատել տեքստում, նշեք այն և սեղմեք Ctrl+Enter՝ տեղեկատվությունը խմբագրին ուղարկելու համար:

Համալսարանական կրթությամբ կանանց ասոցիացիան 20 տարեկան է.պարգևներ Ազգային ժողովից

Համալսարանական կրթությամբ կանանց ասոցիացիայի հիմնադրման 20-ամյա հոբելյանի առիթով ՀՀ ԱԺ նախագահի կարգադրությամբ մայիսի 10-ին ՀՀ ԱԺ պատվոգրերով և շնորհակալագրերով պարգևատրվել են ասոցացիայի մի շարք անդամներ և հասարակական-քաղաքական գործունեությամբ աչքի ընկած կին գործիչներ: Պարգևները հանձնել է ՀՀ ԱԺ փոխնախագահ, ՀՀԿ կանանց խորհրդի նախագահ Հերմինե Նաղդալյանը, ով բարձր է գնահատել Համալսարանական կրթությամբ կանանց ասոցիացիայի 20-ամյա գործունեությունը և առանձնահատուկ կարևորել կազմակերպության դերը մեր երկրի հասարակական-քաղաքական կյանքում կանանց մասնակցությունն ընդլայնելու, որոշումների կայացման հարցում նրանց դերը բարձրացնելու, կանանց միավորելու և ժամանակակից տեխնոլոգիաներին տիրապետող կին լիդերների նոր սերնդի պատրաստման հարցում:

 

Շնորհավորելով ասոցիացիայի անդամներին՝ տիկին Նաղդալյանը նշել է, որ ասոցիացիայի աշխատանքները նոր սերնդի լիդերների պատրաստման ուղղությամբ նախադրյալներ են ստեղծել օրենսդիր և գործադիր իշխանության մարմիններում կանանց առաջադրելու համար:

 

Անդրադառնալով կազմակերպության անցած ուղուն՝ Հերմինե Նաղդալյանը նշել է, որ այն որպես հասարակական կազմակերպություն՝ կայացման դժվարին ճանապարհ է անցել՝ զարգացման յուրաքանչյուր փուլում սահմանելով իր գործունեության առաջնահերթությունները և մտավորական կանանց ներգրավելով երկրի հասարակական-քաղաքական կյանքում՝ միաժամանակ սերտորեն համագործակցելով ՀՀԿ կանանց խորհրդի հետ: Ասոցիացիան այսօր ունի մոտ երեսուն մասնաճյուղ, կանանց լիդերության դպրոց, գենդերային հետազոտությունների կենտրոն, ժողովրդավարության և խաղաղության կենտրոն, որոնցում ներգրավված են և ստեղծագործ աշխատանք են կատարում բազմաթիվ կանայք:

 

Ասոցացիայի անդամներն իրենց հերթին փաստել են, որ 20 տարվա քրտնաջան և ստեղծագործական աշխատանքն ուղղված է եղել կանանց առաջնորդությանն ու ակտիվությանը, որպեսզի կանայք տղամարդկանց հավասար ներկայացված լինեն պետական տարբեր կառույցներում և տղամարդկանց հետ հավասար պատասխանատու լինեն հասարակական և տնտեսական ոլորտներում ժողովրդի հաջողությունների, իրենց քաղաքացիների համար:

 

ՀՀ Ազգային ժողովի պատվո մեդալի է արժանացել Համալսարանական կրթությամբ կանանց ասոցիացիայի հիմնադիր և գործող նախագահ Ջեմմա Հասրաթյանը, ՀՀ ԱԺ պատվոգրերի՝ Կանանց լիդերության բարձրագույն դպրոցի Լոռու մարզի համադասող Արմենուհի Կյուրեղյանը, «Կանանց համախմբումը ժողովրդավարության ամրապնդմանը» ծրագրի ղեկավար Գայանե Արմաղանովան, ասոցացիայի վարչության անդամներ  Լիլիթ Զաքարյանը, Անահիտ Խաչատրյանը, Գայանե Մերոյանը և Անահիտ Աղոյանը: 

 

ՀՀ ԱԺ հասարակայնության և տեղեկատվության միջոցների հետ վարչություն

 

Դիտումների քանակը` 381

Վերադառնալ վերև