Եթե դուք սխա՞լ եք նկատել տեքստում, նշեք այն և սեղմեք Ctrl+Enter՝ տեղեկատվությունը խմբագրին ուղարկելու համար:

«Մենք մի քիչ ամաչում ենք, որ կառավարության կազմում չենք կարողացել ավելի մեծ թվով կանանց ներգրավել»…

 

Այս մասին, այսօր՝ հունիսի 7-ին, ԱԺ հատուկ նիստում ներկայացնելով կառավարության ծրագիրը, նշեց ՀՀ վարչապետ Նիկոլ Փաշինյանը՝ ի պատասխան ՀՅԴ խմբակցության պատգամավոր Արմենուհի Կյուրեղյանի դիտարկմանը, որ կառավարության ծրագրում տեղ չի գտել նրա կողմից   որպես վարչապետի թեկնածու հնչեցված  ուղերձը կանանց ավելի լայն ընդգրկվածության մասին:  

 

Մասնավորապես, ԱԺ ՀՅԴ խմբակցության քարտուղար Արմենուհի Կյուրեղյանը  նշեց , որ Փաշինյանի բոլոր ելույթներում հնչեցված բոլոր ուղերձները տեղ են գտել կառավարության ծրագրում, բացի մեկ ուղերձից, այն է՝ նպաստավոր պայմաններ ապահովել, որպեսզի կանայք ավելի շատ ընդգրկում ունենան պետական կառավարման համակարգում, քաղաքական և հանրային գործունեության մեջ: «Ցավոք, այսօր մեզ ներկայացված ծրագրում այդ ուղերձի արտացոլումը չտեսա: Ի՞նչ կարելի է ենթադրել՝ Դուք այլևս չե՞ք կարևորում կանանց ներգրավվածությունը, թե՞ ուղղակի բացթողում է»,- հարցրեց պատգամավորը:

 

Ի պատասխան Փաշինյանը նշեց, որ եթե անկեղծ ասի, իրենք մի քիչ ամաչում են, որ կառավարության կազմում չեն կարողացել ավելի մեծ թվով կանանց ներգրավել: «Այն, ինչ ասվել է, չափազանց կարևոր է, և իմ՝ որպես վարչապետի թեկնածու, հնչեցրած որևէ դրույթ, անկախ նրանից՝ ընդգրկված է կառավարության ծրագրում, թե` ոչ, չի կարող իր կարգավիճակը փոխել: Ցավում եմ, որ մենք չենք կարողացել շատ արագ շատ մեծ և էական փոփոխություններ անել այդ հավասարակշռության մեջ»,- ասաց նա:

 

 

Կյուրեղյանը, ի հավելումն, նշեց, թե խոսքն այն չէ՝ Փաշինյանն ու այսօրվա կառավարությունը կարևորում են կանանց դերը, թե` ոչ, այլ այն, որ մենք ունենանք ամրագրում օրենսդրության մեջ, որ կանանց ներգրավվածությունը որոշումների կայացման մեջ այլևս անհրաժեշտություն է:

 

Փաշինյանն արձագանքեց՝ ասելով, որ, իհարկե, դա շատ կարևոր է, քանի որ Հայաստանում տեղի ունեցած վերջին քաղաքական գործընթացի առանցքային կարևորությունն այն էր, որ կանանց հսկայական ներգրավվածություն տեսանք այդտեղ: «Սա նույնպես այն կարևոր գործոններից մեկն էր, որը մեզ հնարավորություն տվեց խուսափելու բախումներից, սրացումներից և այլ զարգացումներից: Կարծում եմ՝ դա ժողովրդական հեղափոխության ամենամեծ ձեռքբերումներից մեկն է, և դրանք պետք է արտահայտվեն մեր հետագա քաղաքական կյանքում: Այն, որ մենք ունենք այդ ցանկությունը, միանշանակ է, և մենք պետք է ապահովենք, որ կանանց այդ ակտիվությւոնը շարունակվի մնալ որպես կարևոր գործոն: Այս ամենը ցույց տվեց, որ կանանց ակտիվությունը որևէ կերպ չի հակասում ընտանիքի մասին մեր ունեցած պատկերացումներին և ընտանիքի մասին մեր ունեցած լավագույն ավանդույթներին», – եզրափակեց վարչապետը:

 

Նշենք, որ իրականում խնդիրը  ոչ միայն կանանց քաղաքական մասնակցության և որոշումների ընդունման մակարդակում նրանց ներկայացվածության տիրույթում է: Խոսքը ցանկացած ոլորտում կանանց ու տղամարդկանց  հավասար իրավունքների և հնարավորությունների ապահովմանն ուղղված  պետական քաղաքականության մասին է, որի  արտացոլումը  կառավարության ծրագրում կնշանակեր, որ Հայաստանն երաշխավորում է  իր միջազգային պարտավորությունների մաս կազմող այդ  քաղաքականության իրականացումը:  

 

 

Կարդացեք թեմայի շուրջ մեր կայքում.

 

Կանայք իշխանության կազմում. չարդարացված ակնկալիքները թվերով

 

«Առանց կանանց Հայաստանի կառավարությունը ժողովրդավար չի կարող լինել և վե՛րջ»․ բաց նամակ՝ Փաշինյանին

 

 Ազգային համաձայնության կառավարության կազմում ընդամենը երկու կին նախարար կա  

 

Քաղաքական կուրությունն ինչպես որ կա…

 

Արդյո՞ք երեխայի ծննդյան նպաստների բարձրացումը բավարար միջոց է ծնելիությունը խրախուսելու համար

 

Ն.Փաշինյան. «Մենք պետք է նպաստավոր պայմաններ ապահովենք, որպեսզի կանայք ավելի շատ ընդգրկվեն պետական կառավարման համակարգում»

 

«Հայաստանում ոչ մի քաղաքական գործընթաց կանանց այսքան մեծ ներգրավում չի ունեցել…»

 

Դիտումների քանակը` 741

Վերադառնալ վերև