Եթե դուք սխա՞լ եք նկատել տեքստում, նշեք այն և սեղմեք Ctrl+Enter՝ տեղեկատվությունը խմբագրին ուղարկելու համար:

Քրեական պատասխանատվություն կսահմանվի ատելության խոսքի առավել վտանգավոր դրսևորման համար

Այսօր ՀՀ արդարադատության նախարարի տեղակալ Սրբուհի Գալյանի մասնակցությամբ  տեղի է ունեցել հանրային քննարկում՝ շահագրգիռ մարմինների ներկայացուցիչների մասնակցությամբ: «Խտրականության, ատելության խոսքի և ատելության հիմքով կատարվող հանցագործությունների մասին տարանջատ տվյալների հավաքագրման վերաբերյալ առաջարկությունների և ուղեցույցների նախագծերի ներկայացում» խորագրով ծրագրի քննարկումը կազմակերպվել էր Արդարադատության նախարարության, Հայաստանում Եվրոպական միության պատվիրակության և Եվրոպայի խորհրդի երևանյան գրասենյակի համատեղ ջանքերով:

 

 Փոխնախարար Գալյանը ողջունել է քննարկման մասնակիցներին և շնորհակալություն հայտնել ԵԽի երևանյան գրասենյակին և Եվրոպական միությանը՝ ատելության խոսքի, դրա սահմանների ուրվագծման և համարժեք պատասխանատվության սահմանման խնդիրների վերհանման նպատակով կազմակերպած հանդիպման և ցուցաբերած մշտական աջակցության համար:

 

 

Սրբուհի Գալյանի խոսքով՝ խնդիրը շատ նուրբ է, քանի-որ սերտորեն առնչվում է խոսքի ազատության և դրա սահմանների  հետ: «Այսօր մեր երկրում աննախադեպ իրողություն է արձանագրվում. ունենք խոսքի անսահմանափակ ազատություն, և երբեմն խոսքի ազատության այդ իրավունքի քողի տակ մենք հանդիպում ենք թաքնված կամ  երբեմն նույնիսկ բացահայտ ատելության խոսքի դրսևորումների, ինչն անընդունելի է մեր պետությունում և պետք է համարժեք արձագանքի արժանանա»,- նշել է Սրբուհի Գալյանը և տեղեկացրել, որ ներկայում Արդարադատության նախարարությունը մշակել է օրենքի համապատասխան նախագիծ, որը քրեական պատասխանատվություն է սահմանում ատելության խոսքի առավել վտանգավոր դրսևորման, այն է՝ անձի նկատմամբ նրա որևէ սոցիալական կամ անձնական բնույթի հանգամանքով պայմանավորված բռնություն գործադրելու հրապարակային կոչերի, նման բռնությունը հրապարակայնորեն արդարացնելու կամ քարոզելու համար:

 

          

Քննարկման ավարտին փոխնախարարը հույս է հայտնել, որ այս փորձագիտական քննարկումը մեծապես կնպաստի խտրականության, ատելության հիմքով հանցագործությունների և ատելության խոսքի  դեմ պայքարի ոլորտում առկա խնդիրների վերհանմանը և կօգնի գտնել այն խնդիրների արդյունավետ լուծումը, որն այսօր առկա է մեր երկրում»,- ընդգծել է Սրբուհի Գալյանը:

 

 

ԵԽ երևանյան գրասենյակի ղեկավար Նատալյա Վուտովան կարևորել է նման ձևաչափով քննարկումների կազմակերպումը և վստահություն հայտնել, որ շահագրգիռ կողմերի աջակցությամբ մշակված այս նախագիծը դրական արդյունք կգրանցի:

 

 

Աղբյուրը՝ 

ՀՀ ԱՆ տեղեկատվության և

հասարակայնության հետ կապերի վարչություն

 

Դիտումների քանակը` 363

Վերադառնալ վերև