Եթե դուք սխա՞լ եք նկատել տեքստում, նշեք այն և սեղմեք Ctrl+Enter՝ տեղեկատվությունը խմբագրին ուղարկելու համար:

Orange-ը ֆինանսավորում է հատուկ հավելվածի ստեղծումը աուտիզմով երեխաների համար

Արդեն վեցերորդ տարին անընդմեջ Orange Հիմնադրամի աջակցությամբ Երեւանից եւ ՀՀ մարզերից աուտիզմով երեխաներ խնամակալների եւ դաստիարակների ուղեկցությամբ իրենց ամառային հանգիստն անցկացնում են Ապարանի ամառային առողջարանային ճամբարում: 

 

«Մեր համագործակցության վեց տարիների ընթացքում «Արաբկիր» բարեգործական հիմնադրամի հետ փորձել ենք ստեղծել այնպիսի միջավայր, որը կնպաստի աուտիզմով երեխաների ինտեգրմանը հասարակություն: Ամառային ճամբարը հատկապես կարեւոր է այդ նպատակին հասնելու համար, քանի որ այստեղ նրանք իրենց ամբողջ օրն անցկացնում են ուրիշ երեխաների հետ, միասին սովորում, միասին խաղում եւ հանգստանում», – ասաց Orange-ի Հաղորդակցության գծով տնօրեն Արամ Մկրտչյանը:

Այս տարի «Օգնենք աուտիզմով երեխաներին» ծրագրի շրջանակներում Orange Հիմնադրամը նաեւ ֆինանսավորելու է հատուկ բջջային հավելվածի ստեղծումը, որը կունենա հայերեն, ռուսերեն եւ անգլերեն տարբերակներ եւ կդառնա աուտիզմով երեխաների համար ստեղծված առաջին հայալեզու հավելվածը՝ ինչպես Android, այնպես էլ iOS պլատֆորմների համար:

Հավելվածի ստեղծման վրա աշխատում են հայ ծրագրավորողներ՝ բժիշկ-մասնագետների հետ համագործակցությամբ: Այն գլխավորապես հիմնված է լինելու PECS մեթոդի վրա, որը պատկերների միջոցով հաղորդակցման համակարգ է եւ այսօր լայնորեն օգտագործվում է աշխարհում աուտիզմով երեխաների հաղորդակցական հմտությունները զարգացնելու համար:

«Արդեն վեց տարի է՝ Orange Հիմնադրամի աջակցությամբ իրականացնում ենք այս հրաշալի ծրագիրը, որը թույլ է տալիս համապատասխան պայմաններ ստեղծել աուտիզմով երեխաների սոցիալական ինտեգրման եւ նրանց կյանքի որակի բարելավման համար: Վերջապես մեզ հաջողվեց կոտրել այն կարծրացած պատկերացումները, որոնք գոյություն ունեին մեր հասարակության մեջ աուտիզմի մասին: Շնորհիվ քրտնաջան թիմային աշխատանքի՝ հաջողվեց ստիպել հիվանդությանը նահանջել եւ ստանալ առաջին դրական արդյունքները», – նշել է «Արաբկիր» բժշկական համալիրի գիտական ղեկավար Արա Բաբլոյանը:

 

Աղբյուրը՝ ITel.am

 

Դիտումների քանակը` 2858

Վերադառնալ վերև