Եթե դուք սխա՞լ եք նկատել տեքստում, նշեք այն և սեղմեք Ctrl+Enter՝ տեղեկատվությունը խմբագրին ուղարկելու համար:

Խաղաղություն՝ ծաղիկների փոխարեն

Երևանի № 128 դպրոցը միացել է AYO հիմնադրամի սահմանամերձ Այգեպար գյուղի դպրոցի դիմաց պատ կառուցելու նախագծին: Imyerevan.com պորտալն ու դպրոցի անձակազմը առաջարկեցին դպրոցականների ծնողներին հրաժարվել սեպտեմբերի 1-ին ուսուցիչներին ծաղիկներ նվիրելու ավանդույթից ու դրա փոխարեն ցանկացած գումար նվիրաբերել պատի կառուցմանը, որը կպաշտպանի Այգեպարի դպրոցը ադրբեջանական կրակոցներից: Պատը լինելու է 70մ երկարությամբ և 3մ բարձրությամբ:

 

 

Ինչպես նշեց AYO հիմնադրամի տնօրեն Արմեն Անմեղիկյանը՝ «Գյուղի դպրոցն ու մանկապարտեզը գտնվում են Ադրբեջանի հետ սահմանից 300 մետր հեռավորության վրա: Վերջին 20 տարիների ընթացքում դպրոցն անդադար կրակահերթերի տակ է գտնվել: Պատերն ամբողջությամբ պատված են փամփուշտներից ստացված վնասվածքներով»: 128 դպրոցի տնօրեն Վիկտորյա Սուքիասյանն էլ իր հերթին հավելեց, որ շատ կարևոր է երբեմն հրաժարվել որոշակի հաճույքներից, տվյալ դեպքում՝ ծաղիկներից, որպեսզի օգնենք այն դպրոցականներին, ովքեր սովորում են նման դժվար պայմաններում:

 

Երեք մետր բարձրություն ունեցող պատը նախատեսված է պաշտպանելու դպրոցն ու մանկապարտեզը հրաձգությունից: Այն նաև հնարավորություն կտա երեխաներին ապահով օգտվել խաղահրապարակից: Նախագծի իրականացման համար անհրաժեշտ է 16  հազար ԱՄՆ դոլար, սակայն այս պահին հավաքվել է ընդամենը 3 հազարը: Ի դեպ,  imyervan.com-ի և 128 դպրոցի համատեղ ջանքերով հիմնադրամին է փոխանցվել շուրջ 360 000 դրամ: «Այս գումարը իրականում և՛ տպավորիչ է, և՛ պարտավորեցնող: Մենք ավելի համեստ գումար էինք ակնկալում, սակայն գաղափարն անտարբեր չթողեց ոչ ոքի: Նախագծին մասնակցեցին նույնիսկ այն ընտանիքները, որոնք նյութապես այնքան էլ ապահովված չեն: Այն երկու հարյուր կամ հինգ հարյուր դրամը, որոնք հավաքվել են այսօրվա ակցիայի ընթացքում, հսկայական ներդրում ու բարեգոծական քայլ են»,- նշեց դպրոցի տնօրենը:

 

Ի դեպ, թարմ ծաղիկների փոխարեն ուսուցիչները աշակերտներից ստացել են իրենց իսկ ձեռքով պատրաստած, նկարած ծաղիկներ…

 

Աղբյուրը՝  Imyerevan.com 

Հ.Գ. Միջոցառման ավարտին երեխաները բաց թողեցին իրենց ձեռքում եղած փուչիկները` թղթե ծաղիկները ծայրերին, որպեսզի դրանք գնան ու հասնեն այգեպարցի փոքրիկներին:

 

Թող Հայաստանի երկինքն այսօրվա պես միշտ խաղաղ լինի: Շնորհավոր Սեպտեմբերի 1-ը:

 

Հայ օգնության ֆոնդի «Այո» հիմնադրամի Այգեպար գյուղի  դպրոցի շրջակայքում պաշտպանիչ պատ կառուցելու  նախաձեռնության  մասին ավելի մանրամասն տեղեկություն ստանալու, ինչպես նաև գումար հանգանակելու համար հետևեք հղմանը.

 

https://www.weareayo.org/hy/protective-walls/

 

 

 

 

Դիտումների քանակը` 3101

Վերադառնալ վերև