ՀՀ կառավարությունը որոշել է անպտղության բուժումն անվճար դարձնել բոլորի համար։ «Անկախ բնակության վայրից, սոցիալական, ամուսնական կարգավիճակից ծրագիրը բաց կլինի Հայաստանի բոլոր քաղաքացիների համար և պետական բյուջեի ֆինանսավորմամբ նրանք կկարողանան հաղթահարել անպտղությունը»,— հայտնել է առողջապահության նախարար Անահիտ Ավանեսյանը հունվարի 5-ին կայացած կառավարության նիստում ։
Հիշեցնենք, որ անպտղության հաղթահարման ծրագիրը գործում է երկու տարի։ Եթե նախկինում առաջնահերթությունը տրվում էր զինծառայողներին, զոհված զինծառայողների ընտանիքներին, սահմանամերձ բնակավայրերում ապրող քաղաքացիներին, ապա այժմ այդ ծրագրի շահառուների շրջանակն ընդլայնվելու է և վերարտադրողական օժանդակ տեխնոլոգիաներով բուժօգնության ծրագրից օգտվելու հնարավորություն կտրվի Հայաստանի բոլոր քաղաքացիներին: Ծրագրի շահառու կարող են դառնալ նաև չամուսնացած կամ ամուսնալուծված կանայք։
Առողջապահության նախարարի փոխանցմամբ՝ ծրագրի մեկնարկից՝ 2020 թ․-ից մինչ օրս լույս աշխարհ է եկել 251 երեխա։ Գործադիրը հույս ունի, որ որոշման ընդունման արդյունքում կբարելավվի երկրի ժողովրդագրական իրավիճակը։
Նշենք, որ Հայաստանում անպտղության մակարդակը բարձր է։ 2021 թ․-ին ՄԱԿ-ի բնակչության հիմնադրամի և APR group-ի կողմից իրականացված «Անպտղության տարածվածությունը ՀՀ բնակչության շրջանում» քանակական հետազոտության համաձայն՝ այն կազմում է 16․8%: Առողջապահության համաշխարհային կազմակերպության սահմանմամբ՝ անպտղության 15% մակարդակը համարվում է ճգնաժամային և անդրադառնում է ժողովրդագրության, ծնելիության վրա:
